الشخارة الكهربائية

قليل من الناس ينعمون بنوم هادىء
انا لست واحدا منهم
البعض لديه عادات غريبة بدونها لا يستطيع النوم
فهناك من ينام فى النور مش فى الضلمة
هناك من ينام و التليفزيون شغال
هناك من ينام و الغسالة شغالة او الراديو المهم اى ازعاج جنبه يشعره بالأمان
هناك من يستمتع بالشخير لدرجة اننى تعرفت على ناس بتشخر قبل ما تنام
الاغرب ان هناك من يستمتع بشخير غيره او بمعنى اوضح بيحب ينام جنب واحد بيشخر !
و مثال لهؤلاء هو والد صديقى علاء فقد كان يحب النوم فى غرفته لانه يستمتع بشخير ابنه لدرجة انه اشترى له " شخارة بالكهربا " مكافأة له بعد نجاحه فى الثانوية العامة
و الشخارة عبارة عن علبة بلاستيكية صغيرة تشبه لحد ما الأنف البشرى و لها جزء خلفى يشبه لسان المزمار يتوسطها اسطوانة منقسمة لنصفين النصف الأول فارغ لا يوجد به سوى هواء و الاخر يوجد به قليل من الماء اللزج يشبه لحد كبير المخاط
يخرج من العلبة البلاستيكية سلك و فيشة بمجرد ان تتصل بالكهرباء تعمل الشخارة بميكانيزم الخلخلة الهوائية فتصدر صوتا يحاكى صوت الشخير تماما
بمجرد ان انتجها الصينيون استطاعت الشخارة ان تغزو الاسواق المصرية خاصة بعد ان افرج عنها من الجمارك بعد عودة الهدوء للشارع المصرى بداية من 12 فبراير 2011 و حتى الان
مؤشرات السوق المصرية تبرز تزايد واضح و ملحوظ فى مبيعات الشخّارة الكهربائية و التى يقبل على شرائها المواطن المصرى منذ
ظهورها فى الاسواق
الاحصائيات تشير الى ان استخدامات تلك الألة بالنسبة للمواطن المصرى اختلفت نسبيا عن الغرض الذى صممت من اجله و عن الغرض الذى اشتراها ابو علاء من اجله
فى الأونة الاخيرة سمعنا ان المجلس العسكرى يدرس سحبها من الاسواق المصرية و مصادرتها لما سببته من ارتفاع ملحوظ فى معدل الضوضاء و ما سببته من تلوث سمعى بل و تلوث اخلاقى ايضا
معلومة اخيرة : الصين تدرس تعديل تصميم الشخّارة الكهربائية لاضافة بعض الاوبشنس مثل .. البطارية  لتسهيل استخدامها خارج المنزل و لتتحول الى ما يسمى بالشخارة المحمولة.. الأوتو شخرة و هو اوبشن عند ضبطه يمكنك من استقبال الاخبار و البيانات الصادرة بشكل سلس و مريح .. اللمبة او الكشاف من اجل الشخير فى الظلام ..
بمجرد نزول هذه المقالة و خبر التعديلات الصينية على الشخّارة الجديدة ازداد طلب السوق المصرى على شراء هذه الألة خاصة بعد نزول هذا الخبر فى جريدة اليوم السابع

"   ..إلغاء مصطلح "الرئيس المخلوع" من التلفزيون واستبداله بـ"السابق"

ملحمة الطرطرة مسخرة .. رجالى جدا

كان الطريق طويل
ممل و حر
جدا
لا توجد خدمات كافية على الطريق كما هو حال بلدنا
- حسام انا عطشان عطش السنين
- اتصرف يا خويا مفيش مية غير فى الردياتير
- اقف اقف فيه محل اهو
- ادينا يا عم كرتونة مية
تناول صديقى الطبيب الأنتيخ كميات رهيبة من الماء و انا ايضا
ثم
- اقف اقف عاوز كانز
- هات ياعم الحج 2 كانز
- لا اتنين ايه هات ازازتين 2 لتر

تناول صديقى الطبيب الأنتيخ كميات رهيبة من المياه الغازية و انا ايضا
ثم
- اقف اقف عاوز  من ده
- ايه ده ؟
- يا عم هاتلنا شوية
- ايه يا بنى ده يا ساتر زلوط زلوط حرام عليك
الزلوط هو شىء يشبه و لا بلاش تيييييت لكنه ذو طعم سكرى جدا جدا فهو مصنوع من العسل الاسود او بمعنى ادق فضلات
العسل او ربما فضلات القصب او ربما امممم المهم هو فضلات شكلا و مضمونا
هذا فضلا عن كم الذباب المحيط بحلة الزلوط
تناول صديقى الطبيب الأنتيخ كميات رهيبة من الزلوط و انا ايضا
ثم
- اقف اقف عاوز اطرطر
- تيييييييييييييييييييييت
الصحرا قدامك اتفضل
- لا انا ابن ناس معملش كده

فسيولوجيا ما تناولناه من كميات رهيبة من الماء و المياه الغازية ثم الزلوط الذى جعل من العطش كلمة بلا معنى لا تصف ما نعانيه و على اثره تناولنا كل ما تبقى من كرتونة الماء فادى ذلك بطبيعة الحال الى تحميل زائد على الاربع كلاوى بما تحتويه من نفرون " وحدة بناء الكوليا ولا مؤاخزة " .. الاربع حوالب اصبحت كمواسير المجارى المسدودة.. المثانتان تنتظران رصاصة الرحمة التى تفجرهما ليتخلصا من كم الماء الرهيب الذى تناولناه

- استحمل يا بنى كلها كام كيلو و نبقى فى الريست
- ااااااااااااااااااااه عننننننن احححححححححح اوففففففففففف
- اياك تعملها فى العربية يا بن الناس
وصلنا الريست
اخيرا
اين المبولة ؟
اين المبولة ؟
 و المبولة عشان الشباب السيس اللى ميعرفوهاش هى تواليت جماعى تجتمع فيه كل طبقات و فئات المجتمع على هدف واحد ونبيل الا وهو التخلص من نفايات خطرة
المبولة تتكون من حنفية صغيرة اسفلها حوض صغير به خرم يتصل بالمجارى عدل
و الاحواض يفصل بينها مسافة اقل مما يمكنك من خلالها الاحتفاظ بسرية هذه العملية الفسيولوجية و الاعضاء القائمة على تنفيذها و لكن هذا يعتمد على قدراتك فى اخفاء اعز ما تملك بعيدا عن انظار الفضوليين و المتطفلين و اصحاب القامات الطويلة فى
الاحواض المجاورة لك
بعض الشباب قليلى الحيلة يلجأون احيانا الى الدخول الى الحمام المخصص لعملية التبرز حتى يحتفظ بسرية العملية تماما و لكن
تفضحهم الاصوات الصادرة من الداخل فخرير الماء صوت مميز خاصة و ان كان الشاب منهم بارع فى النشان
و على النقيض يمكنك ان ترى اخرين غير مبالين تماما بالمكان و الموقف و بمن حولهم يتعاملون مع المبولة كأنها سبورة و خرطوم الماء الصادر عنه طابشورة و يرسم و يغسل حتى تصبح المبولة كالمراية او الصينى بعد غسيله
ما علينا
دخلت انا و صديقى الطبيب الأنتيخ كل منا امام مبولته او حوضه الخاص به و بمجرد ان اطلق لهما العنان بدأت علامات الارتياح تظهر علينا
وجدت صديقى الطبيب الأنتيخ ينظر الى اعلى براحة و ابتسامة و قال
-  ياااااه عارف يا حس انا كل ما اخش مبولة او حمام بره بيتنا افتكر موقفين حصلولى موقف حصلى فى المستشفى و التانى فى كارفور
كان يتكلم و نحن مازلنا متشبسين باعز ما نملك فلم ننته بعد
انتظرونا فى الجزء التانى من الملحمة لأكمل لكم ما رواه لى صديقى الطبيب الأنتيخ

مشهد رأسى للجندى المجهول

Edit

مشهد رأسى للجندى المجهول

by Hossam Ahmed on Monday, 23 May 2011 at 16:59

صباح الصباح فتاح يا عليم و الجيب مفيهشى ولا مليم
خبطت النسكافيه بتاعى
ضربت القميص و البنطلون
اخدت العربية و طيرت ع المنشية
حيث مجمع المحاكم القاطن جوار الجندى المجهول
لقد تناولت كوب النسكافيه الساخن فى تمام العاشرة و النصف صباحا و بحمد الله و لاننى سواق ماهر قلبى ميت بعمل غرز ع الكورنيش و لا اجدعها خياطة و لان عربيتى اليوم ده على غير العادة لم تصيبها الحمى و لم ترتفع درجة حرارتها رغم حرارة الجو الشديدة فلم احتاج الى لبوس الجاكمان الخافض للحرارة و لم احتاج لماء الردياتير الساقع .. وصلت للباشا و اقصد الجندى المجهول فى تمام الواحدة و النصف ظهرا علما بأننى اسكن على بعد 12 او 13 كيلومتر من الباشا قصدى الجندى المجهول و حبقى اقولكو هوه ليه باشا و سيد البشوات كمان
كنت على موعد مع صديقى المحامى المجتهد جدا عشان يخلصلى ورقة كده
قدامى نص ساعة عشان الحق اقابله و اخد منه الورقة و اطلع على مصلحة حكومية اخرى اخلص ورقة تانية بنفس الورقة اللى حستلمها منه .. المطلوب الان و انا امام الباشا قصدى الجندى المجهول انى اركن بسرعة عشان الحق ادخل المحكمة
المشهد الأول :
مشهد رأسى للجندى المجهول
هناك اربعة اتجاهات مختلفة للسيارات رغم ان الشارع اتجاه واحد بس بالاضافة الى طرق لولبية حلزونية ابتدعها المواطن المصرى كالعادة خاصة التكسجية و سواقين الميكروباصات و بعض الملاكى لتصبح المحصلة النهائية 7 اتجاهات مختلفة كلها بتودى على بعضها فهى تشبه لحد كبير الشبكة العنكبوتية حيث تجد جميع الاتجاهات تصل بك فى النهاية الى مربع ضيق امام الباشا قصدى الجندى المجهول حيث تجد باشا اخر لا ليس بباشا انه ملاك لابس ابيض فى ابيض يرتدى حلية فسفورية مميزة حينما رايته جف عرقى و ارتاح صدرى من الانفاس و النفخ المتكرر الناتج عن الضيق توجهت له بكلمة رقيقة من الشباك الجانبى (قشطة يا دفعة انت اللى حتظبطها شد حيلك ) و اذا به ينظر لى بابتسامة رقيقة و ناعمة لم ارها قبل 25 يناير يااااااااااااااه البلد اتغيرت فعلا و يتوجه الى سيارتى و يقترب و ينطق ( يا باشا و انى مال امى انى يتحرجو فى بعض و لا يولعو بجاز )
لم يكن ملاكا على الاطلاق و لم تكن ابتسامته سوى ابتسامة ساخرة اطلقها فى وجهى البرىء الممتلىء بالتفاؤل و كأنه يريد ان يقول ( الراجل ده غلبان اووى )
يالا الهول امامى الان ارض فراغ نص متر اسفلت غير مخصص للبيع .. قدمى اليمنى تضغط على البنزين .. العربية تتوجه للأمام يااااااااااااااااااااه لها من مفاجأة غير متوقعة ماذا حدث طخ طيخ يا فندى يا حيوان انت مستعجل اوى بروح امك .. اكيد مش انا اكيد مش انا اللى بتشتم ... لا لا انا انا اللى بتشتم سيارة فارهة سائق فاره و معه 3 اصحابه افرهر منه يا نهارى ايه اليوم ده ؟!
طبعا لانى مستعجل جدا و كمان عاوز الحق اخش ع الفيس بووك اكتبلكو النوت دى فقولت يلا كفانا الله شر القتال و سامحته من احشاء اعماق قلبى على شتيمته و لان ربنا كبير و بيحب اللى يسامح و يغفر اذا بالمفاجأة الثانية ارض فراغ اخرى من الاسفلت تظهر امامى

المشهد الثانى :
ع الرصيف
قربى يا مدام خطوة لقدام
قربى يا انسة خطوة كويسة
انها تلك الاهازيج التى كان يتغنى بها بائع الاندروييرز الحريمى يالها من .... طخ طييييييخ
المرة دى مش حادثة ده ألم لفحته واحدة ست كبيرة على وش ابنها الصغير عشان سحب لا مؤاخزة بتاع حريمى و جرى
الغريب ان هناك مشاجرة نشبت بين الست ام الطفل و البائع و السبب هو انه مصمم انها تشترى البتاع اللى الواد اخده و جرى بيه ظنا منه انه اتسخ و اتجرح حينما سقط الطفل به على الارض و كانت مشكلة الست الكبيرة و خلو بالكو من الكبيرة دى ان البتاع مينفعش تشتريه مش عشان حاجة لا بس عشان مقاسه صغير اوى
اكتفيت بهذا القدر لاننى وجدت ارض فراغ من الاسفلت ظهرت امامى يا لها من مفاجأة رائعة مش ممكن ايه ده ؟!
المشهد التالت :
المفاجأة
رغم ما اعانيه و رغم كل هذه الموءساويات الا اننى وجدت ركنة كم انا محظوظ .. رجل يبدو انه قاضى مستشار حاجة كده طالع بعربيته و حنط انا مكانه شغلت الفهامة و طلعت قدام و اديت انتظار على ما الراجل يظبط حاله و يطلع و بالعفل بيطلع بيطلع طلع خلاص .. ارجع انا بقى مرشدير و اركن يا سلام والله بلدنا حلوة حلوة اوى ...... طخ طييخخخخخخخخ
لا ده صوت طالع منى انا
واحد طحش ابن طحش دخل بعربيته بسرعة و اخد الركنة رغم انى مدى انتظار و مرشدير لا بجد ده بنى ادم قليل الذوق لازم انزل افلقطلو
ايه ده
علامة تعجب
لا علامة اعجاب
كل دى عضلات !!!!!
اه
لا كفانا الله شر القتال
انا متسامح و ربنا كبير

المشهد الرابع و الاخير :
من داخل العربية بعدسة عيون الكاتب السائق اللى هوه انا
عينى نطت على ساعة العربية
الساعة الان تدق الثانية و الربع ظهرا

فى هذه اللحظة ابتلعتنى مشاعر الغضب و فكرت كثيرا ان انزل من سيارتى لألكم الشخص الذى شتمنى فى وجهه و الطحش الذى احتل ركنتى و لكنى متسامح متساااااااااااامح

طبعا مش حنهى قبل ما اقولكو انى رجعت البيت الساعة 4 العصر
رجعت و نسيت كل حاجة عادى ما دى بلدنا من زمان مفيش جديد و مش متضايق من حاجة الا حاجة واحدة بس .. متضايق من الجندى المجهول اللى ضحى بحياته فى يوم عشان البلد دى و فى الاخر مات و محدش عارف هوه مين اساسا ما هو مجهول  بقى ... بس انا متضايق منه فعلا لانه رغم كل اللى بيحصل قدامه ده عادى خالص بااااااااااااااشا باااااااااااااااااااشا مش قولتلكو باشا

صبرى نفد

تعلقت بكرة القدم منذ نعومة اظافرى و كان لاعبو الكرة مصدر سعادة بالغة بالنسبة لى و حبى للكرة جعلنى اعشق اى لاعب مميز يجيد مهارة المراوغة و يعتبر محمد صبرى لاعب الزمالك السابق و الملقب بالكونت دى مونت دى صبرى من اقرب اللاعبين الى قلبى و ايضا اللاعب الاسمر خفيف الظل عبد الستار صبرى عشقت مهارته و عشقت خفة ظله اكثر فهناك لاعب مميز و لكنك تجده غير محبوب او شعبيته لا تتساوى مع لاعب فى نفس مهاراته و لكنه ذو كاريزما تجعل كل من حوله يحبون رؤيته و يطمحون فى التقرب منه .. ليست مصادفة ان يكون لقب  اكثر لاعبين للكرة عشقتهما  هو " صبرى " فيبدو اننى عشقت كل من هو " صبرى " فبعدما اعتزل محمد صبرى اللاعب الكرة فى سن صغيرة و بعدما انهى عبد الستار صبرى رحلة احترافه و " بطّل " كورة فى مصر لم تنتهى اسطورة " صبرى " عندهما فظهر فى الساحة نجم جديد عشقته كثيرا .. فهو ساحر مراوغ خفيف الظل واد لعيب و حريف كاريزما اقوى من حسين فهمى و شخصية اطيب من يونس شلبى .. البعض كان يطلق على اى لعيب كورة قوى الجسمان سريع شويط لقب " ابو الركب " و لكن النجم الجديد الذى احببته كثيرا اطلق عليه المقربون منه لقب " ابو الطب " لما يتمتع به من قوة فى التفكير و سرعة فى اتخاذ القرار يؤهله الى ان يسدد تصويباته التشخيصية و العلاجية فى التمانيات يا حلاوة .. لكن هذا الصبرى الذى احببته سرعان ما افتقدته و رغم حزنى على فراقه الا اننى تمنيت له التوفيق من القلب فهو كان يحلم بهذا اليوم .. اليوم الذى ينفد فيه من قبضة التكليف المستبد ... ربنا يصبرنى و يصبركو .. و لكن بعد ايه ؟ بعد ما صبرى نفد !!
سأفتقدك كثيرا زميلى العزيز

فواكه

احيانا تسمع ان فيه واحدة اسمها فكيهة لكن مظنش حد فينا مر عليه فى حياته شخص اسمه كده .. شوفنا فى الافلام بس اسماء كده متعرفش جابوها من انهى داهية زى فكيهة و نعناعة و فجلة و حاجات كتير من خير مزارعنا
لكن بقى اسم " فواكه " و اللى اخترته يكون عنوان النوت دى هو اسم موجود و متوفر بغزارة و انتاجه المحلى يسمح بالتصدير كمان .. مين فيكو معندوش فواكه ؟؟
فواكه  هو اسم حركى اطلقه احد اعز اصدقائى على الانسانة التى احبها ووجد فيها مصدر التحلية للحياة المرّة اللى بنعيشها
و من ثم اعجب الجميع بالاسم و اصبح فواكه هو يوزر نيم او بروفايل نيم يطلق على كل محبوبة
بقينا بنسمع الاسم ده مع كل رنة تليفون خصوصا لما فواكه تلطعك الرنة فى وقت غير مناسب زى قعدة انس وسط صحابك الصبيان و البنات كمان ما هو انت مسيح لنفسك و كله عارف انك فكهانى قديم
مفيش شك الفواكه شىء لذيذ بيخلى للحياة طعم لان الفاكهة عامة بتجمع كل حاجة حلوة فى الحياة بالنسبة للراجل فهى فى الغالب مؤنثة بشرتها ناعمة طرية و حتى لو مفعصة قشطة بردو و ان كان ع القشرة سهلة الشامبوهات مالية البلد
و طبعا كل راجل فينا له فاكهته المفضلة فيه اللى بيحبها ببذرها و فيه اللى بيحبها مفعصة و فيه اللى بيحبها عصير و اللى بيحبها طرية اوى زى المانجا او ناشفة اوى زى الخوخ كل فاكهة و ليها جمالها و حلاوتها و طعامتها
و فيه بقى اللى بيحبها مسترجلة زى العنب و البلح و الكيوى و طبعا هناك قلة من الرجال بيحب فواكه بتاعته تبقى زى الموز و دول اللهم احفظنا 
و فيه اللى بيحبها تخينة و مقلبظة عشان يحسس و يطبطب ده طبعا عين امه فارغة اساسا و ميملاش عينه غير البطيخ
فى النهاية كل الرجالة فى حياتهم فواكه اما بيستمتع بطعمها او بيحلم بمذاقها  الدور و الباقى على الغلبانين اللى مش  مستطعمين اى نوع من الفواكه و دول بنصحهم بتحليل السكر العشوائى و صائم و بعد الاكل بساعتين لو طلع سكرك عالى تبقى يا معلم كنت بتضرب فاكهة كتير و انت صغير و كفاية عليك كده خللى بالك بقى لكن لو سكرك مظبوط حاول تدور على فواكه فى بلاد غير بلادنا  و تربة غير تربتنا ما هى المبيدات بهدلتنا منه لله يوسف والى

القرد المفعوص

القرود اشتكو فين الموز اللى ع الشجرة ؟
الاسد قال مفيش شجرة اصلا و الغابة تربتها فقيرة .. القرود ثاروا و اتهمو الاسد انت اللى سرقت الموز يا ملك الغابة .. الاسد قال مفيش شجرة و اسكتو بقى وجعتو دماغى .. القرود قالو مش عاوزينك تبقى ملك الغابة قام الفيل قال للاسد امشى انت و انا مكانك و قال للقرود حجيبلكم الموز منه قام الفيل قطع الشجرة و دفنها و طلع الاسد قالهم مش قولتلكو انى برىء و مفيش موز و مفيش شجرة قام قرد مفعوص طلع و قال الفيل ضحك علينا و كنا فاكرينه حيحمينا .. لكن باقى القرود صدقوا الاسد و قالوله ايوة انت مكدبتش علينا مفيش شجرة و مفيش موز و ارجع يا ملك الغابة .. و فى النهاية اتقتل القرد المفعوص بايادى اخواته القرود فى ميدان مصطفى محمود

الدستور يا سيادنا

فى حوارى مع عم جميل و هو حارس العقار الذى اقطن به
يا عم جميل انت ايه رايك فى الثورة

والله حاجة و لا فى الخيال يا دكتور
و ايه رايك فى مبارك
يلا اهو غار فى داهية متجوزش عليه غير الرحمة
و ايه رأيك فى شفيق
لا ده راجل شكله بيستعبط و مبارك حاطه عشان يدارى على مصايبه ويحمو بعضيهم ما انت فاهم يا دكتور
.............
يبدو ان عم جميل فاهم و ملم وفطن وواعى لكثير من الامور التى حدثت منذ 25 يناير و حتى الان ... لنكمل الحوار

طب ايه رأيك فى التعديلات الدستورية
ايه يا دكتور ؟؟
يا عم جميل التعديلات اللى بتتعمل عشان نغير الدستور
ايه الدستور ده و لا مؤاخزى ( الياء مقصودة لانه قادم من منطقة ريفية )
الدستور اللى هوه القانون او العقد اللى بيتحط بيننا و بين الحكومة عشان تحكم البلد من خلاله
لا يا دكتور معرفش
يعنى انت يوم 19 حتقول نعم .. ولا حتقول  لا
...............
لن اكمل الحوار و سأكتفى بهذا القدر
معلومة : عم جميل يمثل 40 % من سكان جمهورية مصر العربية  و دمتم ..

مصر هى كورتى .. فيلم منعوه و احنا نذيعوه

التليفزيون المصرى : مقتل 8 مصريين فى ليبيا

صحفى : السيد وزير الخارجية سمعنا ان هناك ثورة دامية فى ليبيا الشقيقة

ابو الغيظ : نعم هذا صحيح

الصحفى : سمعنا ان 8 مصريين قتلوا

ابو الغيظ : نعم هذا صحيح

الصحفى : و ما رد فعل سيادتكم

ابو الغيظ : اذعنا الخبر بوسائل الاعلام

الصحفى : و ماذا بعد فالثورة مازالت مستمرة و ربما يسقط مزيدا من الضحايا المصريين ؟

ابو الغيظ : نعم هذا صحيح

الصحفى : اذا ماذا ستفعلون ؟

ابو الغيظ : سنذيع الخبر بوسائل الاعلام

الزميل بدر الدين عطية : حتة رئيس sea-snake

ثلاثون عاماً من الخداع والكذب ، ثلاثون عاماً من السرقة والنهب ، ثلاثون عاماً من الظلم والقهر وكبت الحريات ، ثلاثون عاماً وقد كانت لديه الرغبة الملحة فى زيادتها إلى سبعة أشهر أخرى أملاً منه فى إصلاح ما تم إفساده طوال العقود الثلاثة السابقة "قالوا قديماً :ذيل الكلب عمره ما يتعدل ولو علقوا عليه قالب"  .
أعلم جيداً أن ما رآه خلال ثورة الخامس والعشرين من يناير لم يره طوال حياته التي تخطت عقدها الثمانون ،إلا أنني أشهد شهادة يحاسبني الله عليها أنني لم وربما لن أرى له مثيل فى العند وطول البال والمراوغة وعدم اليأس ،اتهمه البعض بالبرود ولن أنسى صديقي الذي أطلق صرخته أثناء الاعتصام بعد أن أدلى الرئيس المخلوع ببيانه الثاني قائلاً "بضان يا ريس" ،إلا أن ما استرعى انتباهي هو النقاش الذي دار بجواري بين احد المعتصمين وأحد عمال النظافة حينما قال عامل النظافة : أوعوا تفتكروا ان مبارك ده فاتن حمامة تبقوا غلطانين ده ثعباااااااان "من نتائج الثورة اوعى تصدق عامل نظافة ،مبارك طااااار والقطنه مبتكدبش" ،وهنا أود رفع القبعة لهذا الرجل فقد كان تعاملنا بالفعل مع ثعبان كبير تضخم وتجبر وتكبر كثيراً إلى أن أقتلعه الثوار بعد ما يزيد عن الربع قرن من الزمان إلا أنه سقط فى النهاية كما سقط قبله فرعون وهامان وقارون.
وإحقاقاً للحق  ،لم يدافع الرئيس المخلوع وحده عن نظامه إذ تطوع العديد والعديد من أصحاب المصالح والمنتفعين والمأجورين عن هذا النظام وقاموا بمحاربة شعب بأكمله من أجل عيون هذا المخلوع "الشعب يعايرهم الآن بإجبارهم على سماع أغنية اعتبره كلب وراح" .
ضمت قائمة المدافعين عن النظام المخلوع ومعاداة الشعب العديد والعديد من الأسماء من لاعبوا الكرة والممثلين وبعض المحامين وأشباه الإعلاميين وبعض سائقوا العربات الكارو ،إلا أن الأبرز في تركيباتهم أنه لم يكن من بينهم شريف أو نظيف أو من يشهد له بالاحترام ،فبداية من الإعلام المصري الحكومي الذى تفوق كوميدياً فى تغطيته للأحداث على أفلام إسماعيل ياسين وعلى الكسار وثلاثي أضواء المسرح ،مروراً بالإعلام الموجه الذى قادته قناة المحور متمثلة في برنامج لا يشاهده أحد طوال " 48 ساعة " والذي كلما شاهدت مقدماه تذكرت فيلم الراقصة والطبال ،كما لا يمكننا أن ننسى ما قام به شلبوكا أو شوشو ابن جليلة او مجدي مقشة عبر مجموعة القنوات الرياضية المتدعبسة .
كما لن ننسى الدور الكبير لبعض لاعبوا الكرة "المفكرين بأقدامهم" مثل الصقر المصاب بأنفلونزا الغباء أو المدرب الكبير سناً والذي خرج لمساندة بابا حسنى وهاجم العيال الوحشة التي قالت لبابا حسنى خد ماما سوزى وسيبونا في حالنا ،وبالطبع لا يمكننا أن نغفل الدور الذي حاول القيام به "التوأم الأقرع الملتصق" من محاولات رخيصة طمعاً فى الحصول على الرضا السامي وصلت إلى حد التحريض على القتل بمنع الطعام والدواء عن المعتصمين المصابين وكذا التهجم على شخصيات سياسية ومفكرين ذات قدر وهامة لن يستطيع هذين الملتصقين أصحاب "العقول ذوات الأصابع" من الوصول إليهم قدراً أو قامة .
هذا ولم يكن مفكرو الأرجل فقط هم المدافعون عن الباطل والواقفون تجاه الشعب الذي أراد حريته ،فقد كان لمراميط السينما المصرية أيضاّ موقفهم والمقصود بمراميط السينما المصرية "هن من تمرمطن وبذلن مجهود جبار في سبيل الوصول الى النجومية الفنية ومفردها مرموطة" فوجدنا غادة عبد الرازق تهاجم الشباب المعتصم فى التحرير أشد هجوم وصل إلى حد الشتائم ،كذلك أيضاً سماح أنور والتي طالبت بحرق المتظاهرين "لا أعرف شخصياً النوع البشرى المنتمية إليه" ،كذلك كانت نادية الجندي وإلهام شاهين "ممثلتين سابقتين من العصور الوسطى" ،بالإضافة إلى المدعوة زينة والتي نعتت شباب الثورة بالرعاع "قام مطرب الجير بالغناء لمؤخرتها" .
كما لم يترك بعض المتشبهين بالرجال الفرصة تمر من بين أيديهم مرور الكرام فقام طرقع زكريا باتهام الشباب والبنات من المعتصمين فى شرفهم الذى هو من شرف مصر ،كما قام مطرب الجير شعر الصدر حسين بالأمر ذاته إلا أن عاقبته كانت سيئة إذ أراد اللعب على وتر الشهداء فنال ما ناله فى ميدان التحرير الذي قام جميع من فيه بإهدائه أغنية أحمد عدويه الرائعة "أديك تقول مخدتش" وظهر تمورة في إحدى الفيديوهات يبكى لما حدث له "كان المشهد أشبه بمن تم اغتصابها وعلى الرغم من استمتاعها إلا أنها حاولت البكاء كي توهم الجميع بأنها شريفة" .
هذا بالاضافة الى العديد من اشباه رجال "الاعمال" الذين حاولوا الدفاع عن هذا النظام حتى لا تنكشف قضايا الفساد المتورطين فيها ،كما شارك ايضا احد اراجوزات النظام من المحاميين المتعفنين والذى دافع من قبل عن نواب سميحة وقام اثناء الثورة بجلب البلطجية لقتل شباب الثورة وقام بالتحريض على قتلهم علناً واختفى الان بعد رحيل الرئيس المخلوع ويدعى البعض قيامه يومياً بسماع اغنية الست "خدنى لحنانك خدنى" والتى طالما تغنى بها اثناء سجنه محاولة منه فى استعطاف الصول زكريا.
ربما كان من الطبيعي أن يتجمع أمثال هؤلاء الكائنات في سلة واحدة ،فأهدافهم واحدة وتصنيفهم واحد وسلوكياتهم واحدة والنظام الموالين له واحد تحت قيادة والدهم بابا حسنى فمن يجتمع حوله هؤلاء يكون جدير بهم وجديرون به أما الشعب فقد لفظه ولفظهم وأودى بهم فى مذبلة التاريخ ،ربما لم تحقق هذه الإستراتيجية ولو جزء بسيط من النجاح الذي علق عليه الرئيس المخلوع أماله العريضة ولكنها جعلتني أؤمن بجزء من تحليل عامل النظافة له والذي وصفه بالثعبان وبما أن الأرض لم تعد مكاناً يسع الشعب والرئيس المخلوع سوياً وبما أن الأرض ملكاً للشعب فلم يعد له مكان سوى الفضاء او البحار ،مما جعلنى أؤمن تمام الايمان بأن الرئيس الثعبان المخلوع ما هو الا حتة رئيس sea-snake

الزمهلاوية

اديها فى التمانيات يا حلاوة .. عاوز تغيظو هاتلو بيبو
فاكرين الراجل المتخلف فى فيلم فوزية البرجوازية ؟؟ و التانى المتخلف الحلاق ؟؟
بلدنا فيها النموذجين دول

الاهلاوى و الزملكاوى

طول عمرنا عايشين على حزب الاهلى و حزب الزمالك

حتى اصبح الاهلى هو حياة جمهور الاهلى و الزمالك هو حياة جماهير الزمالك

جتنا خيبة

اتمنى بعد 25 يناير يكون شبابنا فاق من غيبوية التضليل السياسى .. بيلهونا فى الكورة و لعيبة الكورة شوية المرتزقة اللى محدش فيهم مقطعش فى فروة اللى خلفونا الا القليل جدا المحترمين منهم " محمد ابو العلا .. ابراهيم سعيد .. اسلام عوض .. محمد الميرغنى " منهم ناس كانت معتصمة فى التحرير

هل يعقل انى اروح اهتف باسم لعيب منهم و احرق دمى و اصرف فلوسى عشان شوية عيال منهم الجاهل و منهم الأمى و منهم الصايع مفلحش فى حاجة غير انه يضرب الكورة بالشلوط ؟!!

انا عارف ان معظمنا حيبدأ يبعد شوية شوية عن الهطل بتاع الكورة و الدورى .. و لكن ما اخشاه .. هو الغالبية من المصريين اللذين يتمتعون بالأمية و لا شىء يملأ فراغات المخ و المخيخ سوى الاهلى و الزمالك و الصراع اللولبى الحلزونى بينهما و ايضا الالتراس الابيض و الاحمر و الصراع القبلى بينهما

منكرش انى كنت واحد من اللى بسخر منهم .. مش لاقى حاجة تخرجنى عن جو شغلى و تشبع رغباتى الثورية و فطرتى و فطرة كل بنى ادم فى وجود صراع ما يجعل للحياة معنى .. فالحياة صراع كما قال شريف منير فى فيلم بحب السيما

ما اخشاه ان يستفزنى واحد اهلاوى مع اول خسارة للزمالك فيحرك ما بداخلى من غضب مكبوت و ابدأ فى صب غضبى على كل الفاسدين فى الاهلى و اللى جابو الاهلى .. بعد ما شوفت بعنيا ان كل من يعمل فى هذا المجال بالفعل مرتزقة و فاسدوووون من اول خالد الغندور و التوأم لحد وائل جمعة و احمد حسن و ابو تريكة .. ابو تريكة المثل القدوة .. الا هوه فين صحيح مش يطمننا عليه ؟  ولا كان بيراقب الموجة و يشوفها رايحة فين ؟؟؟؟

انسو الكورة

انسو الاهلى

انسو الزمالك
انسو اى حاجة تافهة
افتكرو بلدكو
افتكرو حسين طه و سالى و حسام فتحى و غيرهم من شهدائنا اللى أكيد ماتو عشانكم مش عشان الاهلى و الزمالك .. ماتو عشان احنا نعيش لبلدنا و نبنيها مش عشان نبنى و نعلى فى ارصدة عمرو زكى و شيكابالا و احمد حسن و ابو تريكة و حسن شحاته

الشرطة و الشعب أيد واحدة

مش ناسى دم اخواتى و اصحابى .. مش ناسى الظلم و التعذيب و القهر
و مش ناسى بلادى اللى بقت اهم حاجة فى حياتى
حسبى الله و نعم الوكيل فيك يا ظابط يللى امرت بقتل اخويا .. و فيك يا عسكرى يللى نفذت الامر زى " البهيمة " و فيك يا حبيب يا عدلى يللى اسمك ملوش علاقة بوصفك
اما راس الحية اللى كان ورا كل ده فكفاية عليه الذل اللى شافه و بيشوفه و ربنا كبير
خلع " المخلوع " و رفع "  المرفوع " من حكم مصر هدانا شوية و نسانا
لكن مازلنا نطالب بمحاكمة الوزير و الظابط و العسكرى .. محاكمة اللى خطط و أمر و نفذ
و لكن ..
مش كل ظابط كده
و مش كل عسكرى كده
و اكيد الوزير اللى جاى عمره ما حيبقى كده
الشرطة قبل ما تكون فى خدمة الشعب فهى اصلا من الشعب .. عودوا الى محل عملكم عودوا الى مقر خدمة الشعب " قسم الشرطة سابقا "
و راعو الله و ضمائركم فى اخوانكم و اهاليكم " شعب مصر "
نفسى أشوف ظابط المرور و هوه بيسلم على سواق الميكروباص و بيقوله " الرخص "
نفس احس ان مأمور القسم عاوز يجيبلى حقى كأنه ابويا
نفسى احس ان معاون القسم اخويا
نفسى احس ان عسكرى الأمن المركزى فعلا امن و فعلا مركزى
نفسى لما اشوف الشرطة فى الشارع اطمن
نفسى نظرة الشرطى ليا تبقى نظرة امان و احترام للحرية
نفسى لما اخش قسم الاقى كرسى اقعد عليه الاقى ظابط زى اخويا ألجأ اليه
نفسى متعذبس فى الرخصة و المرور
نفسى متعذبش فى اقسام البوليس عشان واحد ولا واحدة عنده واسطة
يا ظابط يا مخبر و يا امين مش عاوزك تبقى واسطة و لا احتاج ادفع رشوة ده انا غلبان اجيبلك منين ؟
عاوزكم تبقو الوسيط بينى و بين اللى شاكينى او شاكيه .. تصلح بينا و الموضوع تنهيه و لو حكمت القانون يحمينى و يحميه

و آآآدى عقدك اهو ... و قطّعناه ميت حتة

وجعتو دماغ امى بالضاستور بتاعكو ده
كل ما نقول ارحل
يقولك الضاستور
اصل الضاستور بيقول
اصل مينفعش
اصل النائب
اصل الزفت
يا عم امشى انت و هوه و همّا
انتو ايه ( نظامكو ) بالظبط ؟!!

عزيزى المواطن خدعوك فقالوا " الدستور "
الدستور ما هو الا عقد اتفاق بين طرفين الطرف الاول هو الشعب و الطرف الثانى هو القائمين على ادارة الدولة .. اذا حينما اجد الطرف الثانى يخالف بنود العقد من حقى ان اغضب و اثور فاذا انسحب هذا الطرف يكون العقد لاغى و من حقى اقطعه ستين حتة و اعمل عقد تانى جديد مع حد جديد يقدر يحترم بنود التعاقد
حسنى انت محترمش التعاقد و انسحبت

و آآآدى عقدك اهو ... و قطّعناه ميت حتة

ظــبّــطـولــنــا بقى واحد جديد او نصلّـحه

حتى لا نصنع " حزب واطى " جديد

كنت اود ان ابدأ كلماتى بكلمة " مبارك " عليكم نجاح الثورة و لكن اين مبارك الان ؟ فدعونى اهنئكم بكل كلمات تحمل معانى العزة و الكرامة و الفرحة .. كما توقعنا سننجح و نجحنا

و لكن ..
ليستمر النجاح و ننتقل من مرحلة ما قبل 25 يناير الى مرحلة التغيير الحقيقية التى ناملها لابد ان نتعلم جيدا من دروس الماضى .. فمن لا يعلم تاريخه و يتعلم منه لن يكون له حاضرا او مستقبلا
دعونا نبدأ بتغيير انفسنا جميعا .. على الطالب ان يجتهد و العامل ان يتقن عمله . لا رشوة لا وساطة لا مجاملة لا اهانة لا استبداد لا استغلال لا للتملق لا للنفاق .
و علينا نحن الشباب من اشعل فتيل هذه الثورة و قادها لبر الامان ان نأخذ العبرة من الماضى بكل مساوئه .. نعم ارفض بكل شدة اقامة حزب يحمل اسم ثورتنا العظيمة " ثورتنا " يا شباب لم تكن ثورة جماعات او احزاب و لكنها كما هتفنا ثورة شباااااب .. ثم اصبحت مع مرور الايام ثورة و انتفاضة شعب بالكامل .. لذلك لابد ان يظل ذكرى هذه الثورة مرتبطا بشعب مصر دون تمييز او تفرقة او تحزب او تجمع .. انها ثورتنا جميعا و لم و لن تكن حكرا لاحد .. دماء الشهداء اللذين ماتوا من اجل ان نحتفل نحن اليوم بهذا النصر لم يكن احدهم ينتهج منهجا سياسيا محددا او تيارا من التيارات الموجودة بنسيج هذا الوطن .. لم يكن احدهم مقبلا على الموت من اجل حزب او جماعة بل من اجل هدف اسمى بكثير .. لا تجعلوا من الثورة سلعة تشترى او تباع  أو وسيلة مواصلات يستخدمها البعض للوصول الى محطة المنتفعين و اصحاب المصالح

لقد كان الحزب الواطى اللاديموقراطى حزبا سياسيا تمتلكه السلطة و تم اختيار اسم " الوطنى " حتى يستقطب الفئات البسيطة من شعب مصر و يستغل مشاعرهم الوطنية .. ابتزاز عاطفى اشتهر به النظام السابق

لذلك علينا الا نكرر الخطأ الذى اقترفه ذلك النظام الفاسد و نصنع حزبا جديدا نعتمد فيه على استقطاب الجميع من خلال تعاطف الاغلبية الكاسحة من شعبنا مع ثورتهم .. فكيف تعلن عن حزب يحمل اسم ثورة 25 يناير و لا تجد الكل ينجذب اليه ؟! و هنا ستكون الكارثة .. فنحن قمنا بهذه الثورة من اجل اعلاء كلمة الديموقراطية .. فأى ديموقراطية اذا قمنا بابتذاذ مشاعر المصريين ؟! و بالتالى سنجد كل من يود الترشح لمنصب ما يندرج تحت راية حزب ثورة 25 يناير حتى يضمن النجاح و بالتالى سنجد انفسنا امام برلمان مكون من 100% حزب ثورة 25 يناير و نستنسخ " الحزب الوطنى " مرة اخرى
اخوانى .. لقد شارك فى هذه الثورة شعب مصر بكل طوائفه و انتماءاته الفكرية .. اليسارى و الليبرالى و الاخوان و غير المسيس و غيرهم .. فأرجوكم لا تعطوا الفرصة لغرورنا ان يسرق او يحرق ثورتنا